Heimurinn minn

Allir að herma

Mon, 15 Jan 2007 01:34:19 GMT

1. Hvað gerðirðu árið 2006 sem þú hafðir ekki gert áður? Eignaðist barn í fyrsta skipti. Það var alveg stórt sko

2. Hélstu áramótaheitið og ætlarðu að strengja heit fyrir næsta ár? Man ekki einu sinni hvort að ég var með áramótaheit fyrir nýliðið ár en ég er með heit fyrir þetta ár

3. Eignaðist einhverri nærri þér barn á árinu? já alveg fullt af fólki. Erla, Habbý, Davíð og Hildur

4. Dó einhver nærri þér á árinu? Nei sem betur fer ekki.

5. Til hvaða landa fórstu á árinu? Fór til Kaupmannahafnar í febrúar.

6. Hvað langar þig að fá árið 2007 sem þig vantaði 2006? Peninga og tíma.

7. Hvaða dagsetningar frá árinu 2006 standa upp úr hjá þér? 16 mars, 27 apríl, 30 apríl og 21. maí alveg sérstaklega, líka 22 júlí .

8. Hver var mikilvægasti áfanginn (eða árangurinn) sem þú náðir á árinu? Náði að fæða stelpuna mina án teljandi vandræða.

9. Hver voru stærstu mistökin hjá þér? Þetta er ekki endilega bara bundið við árið en ég get verið alltof góð.

10. Varstu veik eða slasaðist þú á árinu? Ég hef pottþétt fengið einhverjar pestir á meðan að ég var að vinna á leikskolanum. Annars var ég frekar hraust enda fékk ég alveg minn pakka þegar að ég var með heilsdagsógleði fyrstu mánuði meðgöngunnar.

11. Hvað var það skemmtilegasta sem þú keyptir? Fyrstu fötin hennar Birtu sem að ég verslaði í Fields. Ég var engan veginn að trúa því að ég myndi eignast svona litla manneskju sem að myndi passa í þessi föt

12. Gerðist eitthvað hjá þér eða vinum þínum sem er þess virði að halda upp á það? 2 vinkonur mínar giftu sig með pomp og prakt.

13. Hegðun hverra gerði þig sorgmædda eða reiða? Fæst orð bera minnsta ábyrgð

14. Í hvað fór megnið af peningunum þínum? Bleiur og barnamat

15. Yfir hverju varstu spennt? Að bíða eftir henni og athuga hvernig hún liti út og hverjum hún líktist. Einnig hvort að nafnið hennar myndi passa á hana.

16. Hvaða lag/plata mun ævinlega minna þig á árið 2006? ég er undir þínum áhrifum með Sálinni. Svona smá hormónaflipp í lok meðgöngunnar þegar að maður sá myndbandið við lagið
17. Miðað við sama tíma í fyrra ertu:
Grennri eða feitari? Haha pottþétt mjórri enda einu barni færra í maganum á mér
Ríkari eða fátækari? Eftir því hvernig litið er á það. Fátækari af fé en á samt eitt gull

18. Í hvað hefðirðu viljað eyða meiri tíma? Hef ekkert til að sjá eftir. Eyddi öllum mínum tíma aðallega í barnið mitt

19. Í hvað hefðirðu viljað eyða minni tíma? Hanga langt fram í nótt í tölvunni

20. Hvernig ætlarðu að eyða jólunum? Ehhh jólin eru búin og ég eyddi þeim í faðmi fjölskyldunnar. Hafði það ótrúlega gott bara.

21. Við hvern talaðirðu mest í síma? Pottþétt Erlu Guðrún

22. Varðstu ástfangin árið 2006? Nei. 23.

Hversu mörg einnar nætur gaman? fyndin spurning. Ég get ekki séð hvernig ég hefði átt að hafa tíma í það. Líka ekkert sérlega kræsileg kasólétt

24. Uppáhaldssjónvarpsþáttur? Grey’s anatomy, Little Britain, Vinir, prison Break, 24 og ekki sist Fyrstu skrefin (varð að vísu smeyk þegar að ég sá fæðinguna)

25. Hatarðu einhvern núna sem þú hataðir ekki í fyrra? Nei ég stend ekki í því að hata fólk

26. Hvað var besta bókin sem þú last á árinu? Sennilega Konur með einn í útvíkkun fá enga samúð en það er aðallega óléttutengt. Svo eru rosalega góðar bækurnar Da Vinci lykilinn og englar og Djöflar. Annars hefur maður minni tíma til að lesa með barn.

27. Hver var mesta tónlistaruppgötvunin? Engin sem að ég man eftir. Er alveg minnst arty

28. Hvað langaði þig í og fékkst? Heilbrigða og fallega dóttir

29. Hvað langaði þig í og fékkst ekki? Missti af fallegum kjól á Ebay af því að ég var að horfa á Venna Páer. Algjör sóun!

30. Uppáhaldsbíómyndin á árinu? Sú sem að hafði mest áhrif á mig er líklegast Börn

31. Hvað gerðirðu á afmælinu þínu og hversu gömul varðstu? Ég varð 24. Ég fór út að borða í hádeginu og svo var þetta allt bara normal. Nokkrum dögum seinna bauð ég stelpunum í rosalega góðan mat.

32. Hvað hefði gert árið enn ánægjulegra? Gott veður í sumar. Þetta sumar var bara ripoff!

33. Hver var tískan hjá þér á árinu? tískan hjá mér á árinu samanstóð af buxum sem að voru víðar í mittið, bolir sem að náðu yfir sífellt stækkandi bumbuna og svo flíspeysur eina eða tvær því að mér var alltaf kalt. Þetta var nota bene allt í ljótum litum. Svo for aðeins að rofa til með sumrinu og þá var það yfirleitt ljót föt líka og með einum og einum ælublett. Helstu fylgihlutir voru svo barn á handleggnum

34. Hvað hjálpaði þér við að halda geðheilsunni? Mamma og Erla vinkona

35. Hvaða þekktu persónu girndistu mest? Jose Mourinho

36. Hvaða málefni hafði mest áhrif á þig á árinu? Þótt að það hafi ekki borið mikið á góma þá finnst mér sorglegt að foreldrum sé ekki gert kleift að vera lengi í fæðingarorlofi til að kynnast börnunum sínum. Einnig hvað foreldrastarfið er því miður of vanmetið.

37. Hverra saknarðu? Vina minna sem að búa flestir ekki í sama bæjarfélagi og hvað þá sama landi og ég.

38. Af nýju fólki sem þú kynntist á árinu, hver stendur uppúr? Dóttir mín, hún kemur mér á óvart á hverjum degi

39. Hvað lærðurðu á árinu? Að það er rosalega erfitt að læra að gefa brjóst en þegar að það er komið á hreint er það bara yndislegt!

Annáll ársins 2007

Fri, 05 Jan 2007 02:23:50 GMT

Annáll ársins 2007. Þetta er nýjasta trendið og auðvitað er ég með í því. Þessi listi er eins og gefur að skilja aðeins takmarkaður og kannski ekki alveg eftir minni.

Janúar: Árið hjá mér byrjaði í borgarnesi. Ég var nýbúin að komast að því að barnið sem að ég bar undir belti væri stúlka. Stúlka sem að svaf í sónar og var ekkert að taka þátt í þessari vitleysu og þegar að við foreldrar hennar ætluðum að kíkja á hana þá bara nennti hún þessu ekki og setti bara hendurnar fyrir eyrun. Mjög sætt og krúttlegt allt saman. Þetta varð til þess að við fengum alveg hrikalega asnalegar myndir úr sónar og hugsihugs hvaðan ætli hún hafi það. Þetta voru sömuleiðis fyrstu áramótin min í langan tíma þar sem að ég var ekki undir áhrifum. Meðganga gekk annars bara mjög vel og þarna var farið að sjást að ég gengi með barn undir belti greinilega. Nýja árinu var svo fagnað með góðum hópi vina á Búðarkletti heitnum. Birta sparkaði svo í mig og lét mig vita að núna væri kominn tími til að fara heim. Einnig fór ég á fæðingarnámskeið í þessum mánuði fyrir sjálfstæðar mæður. Var að minnast þess núna við vinkonu mína þegar að ég sá að fyrstu dagana eftir fæðingu þyrfti barnið að fá að drekka á 2 tíma fresti. Enginn hafði sagt mér það áður og þarna var of seint að klemma saman lappirnar.

Febrúar: Í byrjun febrúar fór ég í ferð til Danmerkur í þeim tilgangi að versla föt á frumburðinn. Það gekk alveg vonum framar og ég gerði góða ferð þarna út og kom heim klyfjuð. Áður en að ég kom út þá hafði Einar fengið lánaða rosalega flotta íbúð þarna úti fyrir okkur og við lékum hjón í 6 daga. Helgi fékk þau forréttindi að rölta ALLT Fields með mér nokkra hringi og við fengum rosalega falleg föt á litlu snúlluna. Að vísu var hún ekkert að sýna pabba sínum sig of mikið í ferðinni. Þarna ákváðum við líka fallega nafnið hennar yfir hádegisverði. Birta bara alveg út í loftið og af því að okkur þótti það nafn fallegt, og svo Guðrún eftir ömmum sínum.

Mars: Það var mánuðurinn sem að Birta hélt að hún ætti að koma. Eitt kvöldið fékk ég einhverja verki og seyðing og fór þá á fæðingardeildina þar sem að kom í ljós að ég var komin með einhverja samdrætti og því nauðsynlegt að sprauta mig niður og ég þurfi að sofa eina nótt á spítalanum. Með þessu þá þurfti ég síðan að minnka við mig vinnu og fara bara að vinna hálfan daginn sem að var mjög gott enda var maður orðinn þreyttur og ekki vildi maður annað en að barnið færi að koma á sínum tíma.

Apríl: Þessa páskana kom ég öllum á óvart og tók mesta hreiðurgerðakast sem að fólk hefur séð. Þvoði öll barnafötin og það var nokkurn veginn allt tilbúið fyrir hana Birtu mína. Guðný kom heim eftir að hafa verið á Indlandi í nokkra mánuði. Þetta var líka fæðingarmánuður “tvíbura” hennar Birtu. Hann Hinrik Valur kom í heiminn þann 30. apríl og eins og mamma sagði að þegar að hann fæddist að þá var hann fegursta barn i heimi. Eftir lýsinguna hennar Erlu á fæðingunni ákvað ég svo að ég ætlaði helst að sleppa því að fæða en það kom síðar í ljós að ég lét verða af því. Þarna hætti ég sömuleiðis að vinna og það var erfitt að segja bless við allar stelpurnar og börnin. Maður tók alveg ástfóstri við nokkur börn þarna. Eignaðist góðar vinkonur þarna sem að ég er því miður ekki búin að hitta neitt síðan að ég hætti. En það er alltaf á dagskrá. Þarna skilaði ég líka af mér heittelskuðu íbúð minni á Reynimel 76. væri meira en til í að eiga þá íbúð. Sakna enn æðislegu sturtunnar þaðan. Þarna var að vísu eitthvað smá vesen á barninu líka. Birta gat einhvern veginn aldrei haldið sig á sama stað og tókst aldrei að koma sér í rétta stöðu. Eftir að ég fór í vaxtasónar kom í ljós að hún var sitjandi og ég átti að fara í vendingu. Þegar að það kom svo loksins að mér og ég komin á bekk hjá fæðingarlækninum þá kom hún öllum á óvart með því að vera búin að snúa sér við eins og það væri ekkert mál. Ég fór því skjálfandi út af fæðingardeild eftir að hafa fengið Bricanyl að óþörfu. Fékk líka staðfest að Birta væri alveg örugglega stelpa.

Maí: Þarna kom mánuðurinn sem að ég hafði beðið eftir í marga mánuði. Þarna var ég flutt í borgarnes til hennar mömmu og beið svona hérumbil eftir því að eignast þetta barn. Ég var orðin jafnstór og meðalstórt fjölbýlishús þegar að hér er komið við sögu. Eitthvað illa gekk svo að komast að í mæðraskoðun hérna og því þurfti ég að fara í mæðraskoðun út á Skaga þar sem að ég fékk þann vafasama heiður að vera með skrýtnustu bumbu sem að Sara ljósa hefði séð. Mér leið vel og það var ekki að sjá á mér að ég væri komin á steypirinn nema þessa risakúlu sem að var framan á mér. Dagurinn rann upp og fleiri dagar í viðbót. Helgi kom svo heim 20 maí og sama dag fór ég upp á spítala af því að ég hélt að vatnið væri að fara. Tobbi bróðir var alls ekki sáttur við allt þetta vesen að ég ætlaði að dirfast að eiga á hans degi. Það kom þó ekki til þess. Ég fór ófáa hringi í kringum SHA og daginn eftir að hafa sofið eina nótt á spítalanum vaknaði ég og þá var allt farið af stað. Fæðing Birtu gekk eins og best var á kosið og ég hefði ekki viljað hafa neitt öðruvísi. Það að fæða var allt öðruvísi en ég hefði nokkurn tímann getað ímyndað mér og það að fá hana í fangið var æðislegt. Ég og Helgi alveg dýrkuðum hana. Við tók góð tæp vikusængurlega þar sem að ég hafði það gott með fjarstýringu í einni hendi og barn á hinni. Var að vísu erfitt að horfa á eftir Helga út aftur og vera síðan svo ein en það tókst. Brjóstagjöfin gekk eitthvað brösulega til að byrja með en í dag er hún enn á brjósti og ég ætla að halda því áfram eins lengi og ég get.

Júní: þessi mánuður flaug einhvern veginn áfram. Pabbi og Jóna lentu í árekstri í göngunum í mánaðarbyrjun þegar að þau voru á leiðinni hingað að heimsækja okkur mæðgur. Það hefur pottþétt einhver engill verið að fylgjast með þeim þegar að þau voru að fara þarna í gegnum því að þau sluppu með skrámur. Birta fór í pössun í fyrsta skipti til ömmu sinnar og afa í Rangárseli. Á meðan þá fór ég í brúðkaup til æskuvinkonu minnar hennar Hófi. Þarna fór ég síðan í ferð með Birtu 6 vikna gamla á Vestfirði þar sem að við vorum í sumarbústað í Tungudal og við stoppðum líka í nokkra daga á Patreksfirði.

Júlí: þennan mánuð þá skírði ég hana Birtu. Guðrúnarnafnið hennar hafði verið haldið leyndu þangað til þarna og ég held að allir hafi verið ánægðir með það. Hún fékk nafnið sitt þann 22. júlí við mjög fallega athöfn á Borg á Mýrum. Við fengum mjög gott veður eða með betri veðrum sumarsins. Í athöfnina mættu svo nánustu ættingjar mínir og Helga. Grétar, maðurinn hennar Erlu Bjarka bar hitann og þungann af veitingunum í veislunni og svo bökuðu fleiri ættingjar kökur og sona. Mjög góður dagur í minningunni. Einnig fékk ég aðeins þarna að fá smá tíma með sjálfri mér á meðan að Helgi var heima og lærði það að ég kann voðalega lítið en að vera með barninu.

Ágúst: Ég og mamma byrjuðum þennan mánuð á því að vera hústökufólk. Við fengum lánaðan sumarbústaðinn Greni yfir verslunarmannahelgina og yfirgáfum hann ekki fyrr en eftir 3 vikur. Mjög góður tími. Bara að lesa og vera laus við allt sjónvarp og aðrar truflanir.

September: Ég fann mína köllun í hundraðasta skipti og ákvað að það væri kannski að fara í viðskiptagreinar. Ég stóð við það og fór í 3 áfanga við Versló eða bókfærslu, markaðsfræði og fjármál. Einnig fórum við mæðgur að stunda heilsurækt. Ég fór í alveg 6 tíma í ræktina. Fékk hasperur dauðans. Það hefur að vísu orðið eitthvað lát á þessu núna því að bæði námið og það að sinna barninu varð rosalega mikil vinna. Svo fórum ég og Birta líka í ungbarnasund. Hún er algjör sunddrottning og leið vel í vatni.

Október: Afmælismánuðurinn minn. Á þessu ári varð ég alveg háöldruð eða alveg 24 ára gömul. Ber samt aldurinn rosalega vel. Hélt smá boð bara fyrir vinkonurnar heima hjá Erlu. Helgi kom og kíkti svo á hana Birtu og þótti hún orðin frekar stór.

Nóvember: Einhverra hluta man ég ekkert eftir þessum mánuði!

Desember: þessi mánuður leið rosalega hratt. Ég fór í próf í gamla skólanum mínum og það var rosalega skrýtið. Ég náði prófunum með meðaleinkunnina 7 og var ánægð með það miðað við að þetta var bara svona test til að athuga hvort að ég gæti þetta. Ég náði að senda út 50 jólakort með mynd af erfingjanum og hafði ekki sent kort í mörg ár. Svo komu jólin og Birta fékk alveg mest af pökkum. Maður var alveg búinn á því eftir að hafa opnað þetta allt. Svo fórum við til reykjavíkur á milli jóla og nýárs. Þau feðgin fengu að hafa margar góðar stundir saman. Hún fór í jólaboð og á 2 jólaböll. Á gamlársdag vorum við svo í mat hjá pabba í Ísalindinni. Við vorum svo á miðnætti heima hjá henni Erlu vinkonu þar sem að börnin fengu að horfa á flugeldana og þótti í raun ekkert koma til þeirra. Nýja árið var svo kvatt með því að spila trivial pursuit. Getur nokkuð verið að ég sé að verða gömul eða hvað? Áramótaheitið mitt er leyndó og ég hef lært það að oft er gott að skrifa sig frá hlutunum. Annars held eg að þetta sé alltof langt og fólk í raun varla að lesa síðustu línurnar. Þetta blogg ætti því að vera nog fyrir næstu 2 mánuði. Mjög gott að gera svona annála þótt að minn sé e.t.v alltof langur...

Veit að þetta er gamalt en samt svo skemmtilegt

Fri, 17 Nov 2006 11:41:19 GMT

1. Hver ert þú?

2. Erum við vinir?

3. Hvenær hittumst við fyrst?

4. Ertu hrifin af mér?

5. Langar þér að kyssa mig?

6. Láttu mig hafa gælunafn og útskýrðu afhverju þú valdir það?

7. Lýstu mér í einu orði

8. Hvernig leist þér á mig þegar þú sást mig fyrst?

9. Lýst þér ennþá þannig á mig?

10. Hvað minnir þig á mig?

11. Ef þú gætir gefið mér eitthvað, hvað myndi það vera?

12. Hversu vel þekkirðu mig?

13. Hvenær sástu mig síðast?

14. Hefur þig einhvern tíma langað til að segja mér eitthvað en ekki getað það?

15. Ætlarðu að setja þetta á bloggið þitt svo ég geti skrifað um þig?

Myspace

Thu, 02 Nov 2006 14:02:54 GMT

Af því að ég nenni ekki að læra þá er ég að búa til svona myspace síðu. hver vill vera memm? Please svo ég eigi einhverja vini;)
www.myspace.com/heidasal

kræst

Wed, 11 Oct 2006 00:03:59 GMT

Já nú er fokið í flest skjól. Ég er orðin einu ári eldri. Er þetta bara ekki búið núna?

Það ótrúlega gerist!

Sat, 09 Sep 2006 21:26:31 GMT

Ég er ennþá ýkt fúl yfir því að hafa ekki verið valin ungfrú Halló í hallærispartýinu hennar Guðnýjar. Erla var valin ungfrú Halló árið 96 og það var því borðleggjandi að ég yrði valin næst því að Guðny var ekki kjörgeng því að hún var gestgjafi. Ég mætti í þessum forláta hlébarðakjól, fjólublárri bundinnu peysu, bleikum netsokkum og skærgulum skóm og eins perlufesti. Svo var ég með svona temmilega ógeðslega augnmálningu en allt kom fyrir ekki. Ég gefst þó ekki upp og bíð eftir næsta hallærispartýi. Annars er þetta nokkuð góð frammistaða miðað við að hafa verið að reyna að koma sér út á notime eftir að hafa fengið pössun fyrir dóttirina og gefa brjóst og hugga stelpuna. Það einhvern veginn tekst aldrei að vera á réttum tíma þegar að maður er með barn. Ég bara veit ekki hvort að það tekst einhvern tímann aftur hehe.
En góð frammistaða hjá Hlynsa sem að vann það að vera Herra Halló í fötum sem að fyrriverandi hans lét hann kaupa!

Það sem að ég hélt að myndi aldrei gerast, gerðist síðastliðinn miðvikudag. Þetta var eins og hver annar dagur þessi miðvikudagur fyrir utan eitt smáatriði. Það fraus í helvíti, fílar urðu fjólubláir og ég, Heiða Salvarsdóttir fór í ræktina!! Ég tók meira að segja einn hring, án alls gríns og ég komst heim heilu og höldnu. Ég ætla meira að segja að halda áfram að gera þetta því að þetta er ekki jafn slæmt og ég hafði haldið. Næsta skref er því að fara að kaupa mánaðarkort og reyna að nýta það.

Ég hef greinilega farið veggmegin fram úr alla vikuna því að ég var eitthvað svo klikkuð að ég ákvað að mín köllun í lífinu núna þessa viku væri það að fara í viðskiptafræði. Ákvað það klukkan 4 á þriðjudegi og klst síðar var ég búin að skrá mig í fjarnám í versló. Bara svona að halda manni við efnið á meðan að maður er í barneignarfríi. Fór að hafa einhverjar áhyggjur af því að ég hefði kannski minni tíma fyrir Birtu en það er kominn tími til þess að drulla sér upp af rassinum. Þeir áfangar sem að ég fer í eru bókfærsla, fjármál og markaðsfræði. Það kemur svo bara í ljós í desember hvernig ég stend mig. Námið byrjar allavega bara 12 september og ég þarf að fara að redda mér bókum.

Annars fórum við Birta líka í ungbarnasund í gær og það var æði. Aðalbjörg frænka, uppáhalds frænka hennar birtu kom með okkur og svo ákváðu Erla og Hinrik Valur með okkur og því var þetta alveg rosa gaman. Birta alveg elskaði að vera í vatninu og geta svamlað um og það var ekki að sjá neitt á henni annað en að þetta væri bara skemmtilegt fyrir hana. Að vísu kom eitthvað smá kvart i lokin því að ungfrúin var orðin eitthvað þreytt því að hún var líka búin að sofa svo lítið yfir daginn. Og það er ekki að spyrja að því að hún sofnaði eiginlega í fanginu á Aðalbjörg í lauginni.

En þetta er komið ágætt, ég tek við heillaóskum í kommentum hér fyrir neðan!

Hugleiðingar

Wed, 23 Aug 2006 22:19:42 GMT

Ég hef komist að því að ég og dóttir mín Birta erum ekkert alltaf sammála um hvernig hlutirnir eiga að vera. Við höfum lent upp á kant með hina ýmsu hluti og hér verða nefndir nokkrir:
1. Birta telur að það sé rosalega sniðugt að fara á fætur áður en að það er komin birta og fuglar farnir að syngja. Móðirin er nota bene ekki sammála. Hvað varð eiginlega um barnið sem að svaf af sér alla nóttina hér áður eins og draugur. Þetta hefur reyndar bara verið í 2 daga en samt móðirin verður að sofa smávegis.
2. Birta verður alltaf svöng á sama tíma og móðirin. Það vill bara svo heppilega til að ég hef töluvert meiri þolinmæði en hún þegar að kemur að mat (ég banna Halldóru og Fanney að kommenta á þennnan lið!!). Munurinn á okkur er samt sá að ég græt ekki þegar að ég fæ ekki að borða.

Og úr því að ég er svona hérum bil alltaf að horfa á sjónvarpið þá hefur mér ekki tekist að fara fram hjá KFC auglýsingunum sem að eru að meðaltali 30 held ég þegar að Rockstar er!! Og ekkert smá asnalegar auglýsingar. Ef svo stórfurðulega vildi til að ég færi að fara inn í musteri World Class sem að er álíka líklegt og ég færi að hætta að drekka kók (mun aldrei gerast sko) þá færi ég ekki beinustu leið á KFC held ég. Aldrei samt að segja aldrei. En hvað er svo með gaurinn sem að fer svo með KFC til hjartveikrar ömmu sinnar á elliheimili. Viltu bara ekki fá jarðaför með þessu kjúklingalæri eða hvað??

Annars er ég búin að vera í rvk síðastliðna viku og það var bara voða rólegt. Fékk pössun fyrir Birtu og við mæðurnar og Guðný sem á ekkert barn að mér vitandi forum á Pirates of the Caribbean. Ekkert sma góð mynd en það virðist greinilega vera í tísku að hafa framhald á öllu. Ég er greinilega eitthvað ennþá bitur yfir 24 og Prison break (sjónvarp enn og aftur).

Annars fórum við mæðgur saman á menningarnott með mikið af góðu fólki. Við MK stelpur hittumst heima hjá henni erlu og borðuðum salsa kjúkling og eina bestu frönsku súkkulaðiköku sem að ég hef fengið. Bara æði hún Agnes þegar að matur er annars vegar. Svo skelltum við okkur í bæinn bara. Birtan svaf allan tímann og rumskaði varla á meðan að ég plokkaði af henni fötin þegar að við komum heim. Og ég held að það hafi verið töluvert skárri flugeldasýning árin á undan. Greinilega flugeldasýningin komin í einhvern sparigír. Svo tók smátíma að koma sér úr bænum því að það var svo mikið af fólki að ég hélt að við gætum aldrei komist heim.

Svo fórum við mæðgur saman til hans Hróðmars hjartalæknis á mánudaginn. Birta var ekki alveg að kunna við að láta skoða sig svona og lét alveg öllum illum látum og leyfði honum að heyra hvað hún er með mjög góð raddbönd. Ég hegðaði mér aðeins betur svo. En niðurstöðurnar eru allavega þær að það er ekkert að hjartanu hennar Birtu og mitt hjarta er alveg eins og það var áður en að ég varð ólétt að henni. Ekkert sem að lekur eða neitt. Þannig að við mæðgur erum bara rosa fínar.

Annars langar mig ekkert smá að setja inn mynd af henni Birtu hérna inn en kann það ekki. Hjálp einhver?
kv. Heiða

Blessuð

Tue, 01 Aug 2006 15:15:39 GMT

Jæja það hafa margir föstudagar liðið síðan að ég skrifaði og dóttir mín er meira að segja komin í heiminn eftir frábæra fæðingu eða ef svo mætti orða það. Ég væri allavega til í að gera það eftir því að það er í raun þegar að maður hugsar tilbaka ekkert betra en að fá ylvolgt barn ofan á sig eftir smá púl. Mæli með því!

Svo hafa liðið nokkrir mánuðir eða réttara sagt 2 og hálfur mánuðir og stelpan mín er í einu orði sagt æðisleg. Sefur sína 8 tíma á nóttunni og við erum algjörar svefnpurrkur og vöknum á hádegi báðar. Svo finnst henni alltaf svo gaman að sjá mig á morgnana þegar að hún vaknar. Svo talar hún alveg heilu og hálfa dagana. Mállýska sem að ég skil því miður ekki en samanstendur að mestu af orðinu agú og ho.

Hún er líka greinilega skyld mér á einhvern hátt því að hún elskar að borða. Það að bíða eftir mat fyrir hana er í raun óbærilegt fyrir hana. Þá koma líka bara öskur og það mjög hátt og það gæti vakið heilt hverfi. Svo er hún líka löng og mjó eins og mamma sín. Og já ég gleymi að segja að hún er alveg gullfalleg!

Svo skírðum við hana um daginn og fékk hún nafnið Birta Guðrún. Birta er bara alveg út i loftið og á vel við hana því að maður sá það á henni um leið og hún fæddist. Hún er bara algjör stjarna og sólargeisli. Guðrúnarnafnið fær hún aðallega út frá ömmum sínum sem að heita Birna Guðrún og Guðrún.

Ég ætla annars að reyna að vera dugleg hérna en ég má eiga það að ég er búin að vera svo dugleg á heimsíðunni hennar Birtu.

Veit annars bara ekkert hvað ég á skrifa því að maður er bara alltaf í mömmó en ég reyni...

Settur dagur á síðasta föstudag og nei ekkert að gerast..

Sun, 14 May 2006 13:52:21 GMT

Veit bara ekkert hvort að ég ætti að vera að setja nýja færslu hérna inn því að það kommentaði ekki neinn hjá mér síðast!! En úr því að ég hef ekkert betra að gera þá skellir maður sér á þetta. Jæja þá er dagurinn sem að maður er búinn að bíða eftir loksins kominn og farinn:lol: Sem þýðir það að það megi gera ráð fyrir því að ég eigi 12 daga eftir ef að þetta kemur ekki fyrr. Ég er farin að skjóta á að þetta verði á Eurovision. Það er allt orðið ready held ég og það er bara að bíða. Ég væri að blekkja sjálfa mig ef að ég segði að þessi bið væri ekkert mál en þetta er samt ekkert svo slæmt. Fint að eiga bara rólega daga og borða, vera með tærnar upp í loftið og koma mér fyrir:haha: Hef verið dugleg að fara út fyrir dyrnar og skellti mér meira að segja á tjúttið í gær í korter þar sem að gamlir starfsmenn KB voru saman komnir. Það urðu allir frekar hissa þegar að ég sagði þeim að ég hefði átt að eiga í gær og töluðu aðallega um hvað maður væri nettur. Sem að er í algjörri mótsögn við mömmu sem að sagði í gær að ég væri í laginu eins og fjall þegar að ég labbaði fram hjá henni í náttslopp:) Svo var það bara rúntur með Fannari, Kristín, Heiðrún og Lóu til alveg 2 um kvöldið. Svaka dugleg:)

Svo eru sérstakar kveðjur til Vesturborgarstúlknanna sem að ætluðu að hittast í kvöld. Vildi að ég væri með ykkur en ég þori bara ekki að fara suður og er bara mús:)

En ég held að ef að þetta verði eitthvað mikið lengra fer ég bara að bulla. Endilega verið dugleg að láta vita af ykkur. Bæði hjá mér og litlu skvísu:)

Komin í sveitina

Thu, 04 May 2006 14:10:24 GMT

Ég er flutt í sveitina loksins og sé fram á það að vera hér í sumar. Kom hingað á síðasta föstudag. Það var smá pressa að tæma Reynimelinn en það tókst undir lokin. Af hverju heldur maður Anna sá að vísu að mestu um þrifin en ég var eitthvað svo þung á mér þegar að það átti að fara að þrífa :lol: Siðustu dagar hérna hafa verið rosalega góðir. Fór í Sauðhúsaskóg um helgina og það var æði. Einhver æðislegasti staður sem að ég veit um.

Rosalega skrýtið að vera síðan hættur að vinna. Fór á síðasta föstudag svo að kveðja gellurnar og börnin. Það var næstum því eins og maður væri bara að fara í smá frí. Maður saknar samt leikskólans dáldið mikið.

Lenti svo í því að MU meiddi sig en Andri lenti í smá slysi á bílnum. Þannig að síðustu vikuna í rvk var maður bara á bílaleigubíl en engar áhyggjur MU er kominn aftur á göturnar og flottari sem aldrei fyrr.

Litla krílið hefur það bara alveg ágætt. Gerði smá óskunda í síðustu viku þegar að ég mætti í vaxtarsónar ásamt Guðný "frænku". Þá reyndist stelpan vera sitjandi og með svona fínt krosslagðar lappir. ljósan sem að setti mig í sónar vildi setja mig strax í vendingu en aldrei þessu vant var ég búin að borða morgunmat :) Því var ákveðinn tími í vendingu daginn eftir um morguninn sem að ég mætti svo í. Ég fékk þetta skemmtilega Bricanyl og leið rosalega illa af því. Svo þegar að ég var komin upp á borð hjá lækninum þá þreifaði hún og fann að barnið var búið að snúa sér. Þannig að það er lítill prakkari innanborðs. Ég hélt fyrst að þetta væri eitthvað grín en svo reyndist ekki.

Annars hefur litlum börnum verið að rigna niður. Erla átti litla fallega strákinn sinn á síðasta sunnudag. Hann lét soleiðis hafa fyrir sér og kom út með miklu showi. Habbý eignaðist svo litla prinsessu 2 maí og hún er alveg rosalega falleg. Svo átti Lotta stráklinginn sinn 30 apríl líka alveg eins og Gerða sagði. Þannig að pant vera næst :!:

Annars er maður í því að gera barnalandssíðu úr því að maður er kominn í fæðingarorlof. Það er lítið komið inn á hana en það gerist vonandi fljótlega. Aldrei að vita nema að maður setji inn bumbumyndir inn á hana en býst við því að það verði önnur fyrirsæta þarna heldur en ég. Síðan er læst en þeir sem að vilja fá leyniorðið endilega sendið póst þá á netfangið sem að ég gef upp á síðunni. Það er allavega kominn hlekkur á síðuna undir litlu dúllurnar. Verið dugleg að kíkja og kvittið svo!

Hæ hæ hæ

Thu, 20 Apr 2006 22:07:17 GMT

Svo margt búið að gerast að ég veit ekki hvar ég ætti hugsanlega að byrja að skrifa.

Guðný mín er loksins komin heim frá Indlandi og það er sko æðislegt að fá hana. Ég, Agnes, Sigrún, Erla og litlu bumbubúarnir skelltum okkar á flugvöllinn að ná í hana. Henni brá rosalega því að hún átti bara von á mér en ekki allri þessari strollu. Svo brá henni líka aðeins þegar að hún sá stærðina á okkur Erlu en hún er ekkert sú fyrsta sem að bregður að sjá okkur hehe.

Svo eru páskarnir nýliðnir og þeir voru æði. Fór í 2 fermingar, eina hjá Rakel ýr og svo aðra hjá Elísu frænku. Ég er bara svona hrikalega veisliglöð og elska svona veislur ólíkt einhverjum sem að ég þekki. Eg var aðallega bara heima hjá mér því að ég nennti hreinlega ekki að fara út. Klæðnaðurinn yfir páskana stóð aðallega af náttfötum og fleira. Með betri páskum hingað til.

Ég var svona hérumbil alveg óstoppandi í hreiðurgerðinni og var viðþolslaus í því að þrífa ALLT sem ég komst með hendurnar í. Föstudagurinn langi fór aðallega í það að þvo öll föt af prinsessunni, ásamt sængum, teppum, handklæðum og ég veit ekki hvað. Ég hélt að þetta væri ekki neitt af fötum sem að ég væri komin með en það reyndist ekki rétt hjá mér því að þetta var rosalega mikið. Síðan tók ég herbergin hjá strákunum og þurfti nánast að þrífa í kringum þá. Mamma var eitthvað að reyna að stremma mig af og var líka í því að þrífa og tognaði svo í baki a því að elta mig.

Svo eru síðustu vikurnar mínar hérna á Reynimelnum senn á enda þar sem að ég flyt í næstu viku í nesið mitt. Það virðist að vísu eitthvað standa á sér að ég nenni að setja í kassa og er búin að fá liðsauka frá henni Guðný. Vinnan klárast á morgun og það verður hugsanlega ekkert auðvelt að kveðja litlu dúllurnar. En maður er víst að fara að koma með eina sjálfur. Skilst samt á Erlu og Habbý að þær ætli að fá að vera á undan mér og ég ætla að leyfa þeim það :haha: Annars eru bara 3 vikur þangað til að skvísan á að mæta á svæðið eftir 3 vikur. Barnalandssíða verður sett á laggirnar þegar að það fer að hægjast um hjá manni. Skvísan tók loksins upp á því að skorða sig, mér til ómældrar gleði. Tókst síðan líka að fá vaxtarsónar á í næstu viku til að tékka á stærðinni á henni. Ljósan heldur að þetta barn verði hugsanlega bara 13 merkur miðað við settan dag og mér finnst það bara fínt.

En endilega allir að kommenta. það eru þvílíkt margir sem að kíkja við en enginn kommentar svo. Ég hljóma alveg eins og síðasta færslan hennar Lottu. Btw Lotta hvar ert þú og barnið?

Heyrumst

nýjir tímar

Sat, 25 Mar 2006 17:26:31 GMT

Í dag upplifði ég nokkuð sem að ég hélt að ég ætti aldrei eftir að upplifa.. þ.e. það að passa ekki í fötin mín:(

En fljótustu meðgöngu í heimi fer bráðum að ljúka því að það er ca 7 vikur eftir miðað við settan dag.

Hafið það annars gott í dag;)

Mars

Sun, 19 Mar 2006 00:04:49 GMT

Blessuð. komin nýr mánuður og allt. Ég er bara heima á laugardagskvöldi og það er bara nokkuð ágætt finnst mér. nokkrar spólur sem að bíða eftir að vera horft á og svona úr því að maður er ekkert stemmdur fyrir það að fara á djammið þessa dagana.

Mánuðurinn byrjaði með hittingi hjá leikskólaskvísunum sem að samanstóð af mér, Ósk, Arndísi og Söndru. Ég bjó til kjúklingasalatið hennar Hrefnu sem að ég stal uppskriftinni að í einhverjum H6 hittingi einhvern tímann. Klikkar allavega aldrei. Arndís og Sandra sáu svo aðallega um það að drekka og sona og gerðu það með prýði og fóru vel kenndar héðan af Reynimelnum eða ég skutlaði þeim þ.e. Alla þá helgi leið mér eins og ég væri þunn sem að ég átti alls ekki skilið því að ég hafði ekkert gert til að verðskulda það. Á sunnudeginum eftir það hélt ég að ég væri við dauðans dyr gjörsamlega þar sem að ég var með krónískan höfuðverk. Læknavaktin var það, þar sem að ég var greind með sýkingu í ennis og kinnholum og fékk vikuskammt af pensilíni, nammi namm eða hitt og heldur:( Semsagt marsmánuður byrjaði vel eða hitt og heldur.

Ekki skánaði það á miðvikudaginn sl. þar sem ég fór í skoðun til Gígju ljósu sem að skikkaði mig til að vera heima þann dag og hvíla mig út af því að ég var eitthvað að kvarta undan samdráttum og túrverkjum. Svo komumst við að því að daman mín liggur í þverlegu á meðan að hún ætti að vera að fikra sig í höfuðstöðu. Um kvöldið voru verkirnir ekkert búnir að skána og þetta var ekkert of þægilegt:^) Þannig að ég hringdi upp á fæðingardeild og var látin koma. Á leiðinni inn rakst ég á einhverjar hjúkkur sem að spurðu mig voða indælislega hvort að ég væri nokkuð komin til að fæða, ég hélt nú ekki þar sem að ég á ennþá nokkrar vikur eftir:^) Ég var allavega sett í skoðun og monitor þar sem að greindist einhver erting í leginu en samt engin útvíkkun sem betur fer. Fékk síðan sprautu við samdráttunum. Þannig að ég þurfti að gista þarna yfir eina nótt vegna hótana um fyrirburafæðingu. Þannig að maður er bara búinn að liggja með tærnar í loftið meirihluta vikunnar og er farið að leiðast smá. Maður verður svo paranoid að það er alveg ótrúlegt en það er allt í lagi núna. Líka búin að fá tilmæli frá henni Erlu bumbu að hún eigi víst að vera á undan. Svo er bara spurning um hvort að maður þurfi að minnka við sig vinnu eða hvað maður gerir. Kemur allt í ljós líklega.

Já og svo á ég rosalega flotta myndavél sem að ég keypti af Einsa. Nánast ónotuð og svaka flott. Hún var ekki nógu flókin fyrir tækninördið en nógu flókin fyrir mig. En videóið mitt bíður. Heyrumst;)

febrúar að verða búinn

Sun, 26 Feb 2006 22:05:17 GMT

Jæja best að gera eitthvað í bloggi og kannski best að byrja eitthvað blogg á því að afsaka það ekki að það sé svo langt síðan að maður bloggaði síðast:haha:

Annars er fullt að frétta svo sem. Kíkti í heimsókn til pabba gamla á fimmtudaginn sem að færði mér góðar fréttir. Hann ætlar að kaupa íbúð fyrir mig og litlu skvísu sem að ég myndi leigja af honum Maður vissi ekki hvort að maður ætti að hlæja eða gráta. En það er alveg á hreinu að ég á besta pabba í heimi og þið megið ekki eiga hann því að ég á hann. Þannig að núna er á stefnunni að láta sig dreyma um fallegar íbúðir og það er ekkert smá mikið til af fallegum íbúðum á sölu núna. Það er allavega fullt af áhyggjum létt af manni með þessu og ég er líklega með besta leigusala sem að hægt er að hafa og öruggt húsnæði í Reykjavík að sjálfsögðu. Þá gæti maður farið að plana frekara nám.

Mér og litla beibí líður svo líka vel. Litla er greinilega að stækka rosalega mikið þessa dagana og er farin að taka frekar mikið pláss með viðeigandi spörkum í rifbeinum. Markmið mitt næst þegar að ég verð ólétt (sem að verður þegar að ég verð komin með mann:!:) er að láta kippa nokkrum rifbeinum út og fá þvaglegg:haha: Það er samt margt verra en að ganga með barn og maður má víst vera heppin að geta þetta.

Fór í skoðun á föstudaginn til nýju ljósunnar sem að er frænka hennar guðnýjar vinkonu. Henni þótti þetta dáldið mikil frjósemi hjá einum vinkonuhóp þar sem að ég og Erla erum báðar núna í skoðun hjá henni:P Hún bað allavega kærlega að heilsa þér Guðný mín. Hún var reyndar vond við mig og stakk mig því að henni þótti ég fullföl og ástæðan er sú að ég er núna 99 í járni sem að ætti að vera um 110. Ég fór því í Heilsuhúsið eftir vinnu og keypti mér fljótandi járn. Maður finnur ekki bragðið einu sinni af því þegar að maður drekkur það með trópí. Einn poki er eins og 4 kg af brokkolí eða eitthvað álíka. Svo lenti ég á besta sölumanni ever og keypti líka Með barni af þessari konu og get því kannski farið að taka allt í einum pakka og já Anna mín það er Omega 3 í þessum töflum:)

En þetta er farið að verða leiðinlegt blogg og þeir sem að finnst það leiðinlegt geta kvartað í kommentum:haha: Líf mitt er hreinlega ekki áhugaverðara en þetta:)

Framundan er síðan saumó með H6 og hittingur vonandi með leikskólagellunum þar sem að maður fær að hitta Dísu skvísu sem að ég er ekki búin að hitta held ég á nýju ári. Ekki það að það sé ekki líka gaman að hitta H6 skvísurnar.

Allavega! Go wild í kommentakerfinu:)

nýtt blogg!

Mon, 13 Feb 2006 23:47:51 GMT

jæja fullt búið að gerast síðan að ég skrifaði síðast.

Ég er búin að ljúka fæðingarfræðslunámskeiði takk fyrir! alveg reglulega skemmtilegt. Það skemmtilegasta var líklega að fá að fara á fæðingardeildina og skoða þar. að vísu varð maður smá skelkaður þegar að maður heyrði öskur fram á gang en þetta er víst partur af programminu hjá sumum;)

svo er nýlega afstaðin ferð til Danmerkur sem að var alveg æðisleg og mikið gert. Ég flaug út á miðvikudegi og Einsi sótti mig á Kastrup. Ég hafði farið ogeðslega sæt út en var fljót að draga upp stóru nike úlpuna mína þegar að ég sá vetrarríkið þarna í dk. Ég og einsi byrjuðum á því að leggja okkur í fínu íbúðinni sem að vinkona hans Einsa lánaði okkur. Svo var farið á fisketorvet en ég var ekki alveg til í að fara í það strax að versla og líka frekar skrýtin tilfinning fyrst að kaupa lítil barnaföt á ófætt barnið manns. Buðum svo Helga í mat um kvöldið í alveg geggjað góðan pastarétt sem að ég og Einar kokkuðum.

Á fimmtudeginum tókst mér að labba af sjálfsdáðum þegar að ég loksins vaknaði yfir á strikið þar sem að ég eyddi 2 tímum í HM. Ég vil meina að ég hafi verið svona lengi af því að ég villtist þarna inni því að það er allt svo stórt þarna inni og tekur tíma að máta þegar að maður er aðeins stærri en vanalega. Síðan fórum ég og Einsi með henni Líney á Jensens og ég fékk loksins mína heittelskuðu nautasteik. Kvöldinu lauk svo með alltof spennandi 24 þáttum!

Föstudagurinn fór svo í það að þræða allar barnafataverslanir í Fields með Helga og ég held að við höfum verið 5 tíma í allt þarna inni með pásum :D Það var allavega rosalega mikið keypt og vá hvað ég var komið með mikið ógeð á bleikum fötum og sona undir lokin var maður farinn að kippa fötum úr strákadeildinni. Svo um kvöldið var það heimsókn til gumma og Ingibjargar þar sem að ég og Einar stóðum uppi sem sigurvegarar í sequence!

Helgin var annars voðalega chilluð og það var farið út að borða á kínverskum stað, danskt bíó á Walk the Line sem að er ein besta mynd sem að ég hef séð lengi, pælingar í nöfnum á litla stúlku og ofboðslega mikið langþráð chill.

Danmörk fær allavega fullt hús stiga fyrir þessa ferð allavega. Annars er lítið annað að frétta af manni nema það að í dag eru 3 mánuðir í litlu skvísu. Vonandi ekki mikið meira. Þrátt fyrir mikil mótmæli frá nokkrum borgnesingum þá mun ég að ölllum líkindum eiga út á skaga eftir að hafa skoðað deildina hjá þeim. Ekkert smá flott deild og mikið huggulegra heldur en í rvk. Ég fæddist allavega út á skaga og vil ekki meina að ég sé alvarlega skemmd eftir það;)

Foreldrar barnanna á leikskólanum eru fyrst núna að taka eftir þvi að maður sé óléttur sem að er kannski ekkert skrýtið því að þetta er kannski ekkert stærsta kúla ever en fer stækkandi og maður er ekkert ennþá farinn að kjaga sem betur fer. Forvitnum er velkomið að kíkja á mann og aldrei að vita nema að maður setji inn nokkrar bumbumyndir. Var akkúrat að smella af nokkrum í kvöld.

En vonandi eru Fanney og Arndís mín ánægðar núna. Verð svo að fara að sjá ykkur:)